Réamhrá
Tá an Coimisiún Imscrúdúcháin tiomanta do chur chuige dírithe ar mharthanóirí agus trámathreoraithe thar gach gné dá chuid oibre. Aithnímid go bhféadfadh dúshlán a bheith i gceist le bheith i dteagmháil leis an gCoimisiún, agus eispéiris a thabhairt chun cuimhne. An tosaíocht atá againn ná a chinntiú go bhfuil ár bpróisis inrochtana, measúil, agus go bhfuil tacaíocht ar fáil iontu dóibh siúd uile a roghnaíonn le páirt a ghlacadh.
Tacaíocht Thiomnaithe Rannpháirtíochta sa Suirbhé
Chun tacú le daoine atá ag smaoineamh ar pháirt a ghlacadh i suirbhé tosaigh an Choimisiúin, tá sé socraithe againn le saineagraíocht sheachtrach ina bhfuil saineolas faoi bheith ag obair le marthanóirí ar daoine fásta iad de dhrochúsáid ghnéasach leanaí, chun tacaíocht thiomnaithe rannpháirtíochta a chur ar fáil. Is é One in Four (Duine Amháin as Ceathrar) an eagraíocht seo.
Tá an tseirbhís seo ar fáil do dhuine ar bith atá ag smaoineamh ar pháirt a ghlacadh sa chéad chéim de chuid an Choimisiúin. Is é atá i gceist leis an gcéim seo ná suirbhé a chomhlánú faoi eispéiris nó eolas a bhaineann le drochúsáid ghnéasach stairiúil a bhaineann le scoileanna.
San áireamh sa tSeirbhís Tacaíochta Rannpháirtíochta sa Suirbhé, beidh an méid seo a leanas:
- Cuidiú le cinneadh eolach a dhéanamh faoi cé acu páirt a ghlacadh ann
- Ceisteanna praiticiúla a fhreagairt faoin gcaoi leis an suirbhé a chomhlánú san Fhómhar in 2026
- Cuidiú leo siúd a bhfuil riachtanais bhreise acu le páirt a ghlacadh
- Eolas soiléir a chur ar fáil faoi cad atá i gceist le rannpháirtíocht
- Eolas a chur ar fáil faoi thacaíochtaí eile atá ar fáil, lena n-áirítear tacaíochtaí mothúchánacha agus síceolaíochta, nuair is gá.
Is féidir leat teagmháil a dhéanamh le Seirbhís Tacaíochta Rannpháirtíochta an tSuirbhé um Dhuine Amháin as Gach Ceathrar:
- Ar an bhfón: (01) 611 4654
- Ar ríomhphost: coi@oneinfour.ie
Tacaíocht Leanúnach agus Tuilleadh Rannpháirtíochta
Tabharfar cuireadh do rannpháirtithe sa suirbhé lena roghanna a chur in iúl maidir le tuilleadh rannpháirtíochta leis an gCoimisiún, lena n-áirítear aon riachtanais tacaíochta a bheadh acu.
Cuirfear tuilleadh eolais ar fáil faoin tacaíocht atá ar fáil agus faoin gcaoi ar féidir rochtain a dhéanamh uirthi de réir mar a leanann an Coimisiún ar aghaidh.
Seirbhís Rúnda agus Neamhspleách
Feidhmíonn an tSeirbhís Tacaíochta Rannpháirtíochta sa Suirbhé go neamhspleách ar an gCoimisiún. Is príomhchosaint í seo lena chinntiú gur féidir le daoine aonair comhairle agus tacaíocht a iarraidh i dtimpeallacht rúnda agus shábháilte.
- Ní chuirfear aon eolas a roinntear leis an soláthraí tacaíochta ar aghaidh go dtí an Coimisiún ach amháin má tá cead soiléir tugtha ag an duine.
- Má chinneann duine gan dul ar aghaidh leis an suirbhé, beidh a (h)aitheantas go hiomlán faoi rún, agus ní gheobhaidh an Coimisiún aon eolas fúthu.
Tá an struchtúr neamhspleách seo deartha chun daoine aonair a chumasú chun féachaint ar a roghanna go neamhshrianta, gan aon dualgas orthu páirt a ghlacadh.
Tá an Coimisiún tiomanta lena chinntiú gur féidir le gach duine ar mian leis/léi dul i ngleic leis, é sin a dhéanamh ar bhealach ina mbíonn meas ar a neamhspleáchas, ina dtugtar tús áite dá f(h)olláine, agus ina n-aithnítear a t(h)aithí saoil.