In Éirinn, bunaítear Coimisiúin Imscrúdúcháin faoin Acht um Choimisiúin Imscrúdúcháin 2004.
Príomh-mholadh Fiosrúcháin Scóipe faoi Dhrochúsáid Ghnéasach Stairiúil i Scoileanna Lae agus Cónaithe arna reáchtáil ag Oird Rialta ba ea an Coimisiún Imscrúdúcháin.
Bhunaigh an tAire Oideachais agus Óige an Fiosrúchán Scóipe mar fhreagairt do nochtadh de líomhaintí de dhrochúsáid ghnéasach stairiúil i scoileanna arna reáchtáil ag oird rialta, tar éis chraoladh Chlár Faisnéise ar a hAon (Documentary on One) de chuid RTÉ, Blackrock Boys.
I dTuarascáil an Fhiosrúcháin Scóipe léiríodh go bhféadfadh scála féideartha na drochúsáide gnéasaí stairiúla i scoileanna arna reáchtáil ag oird rialta a bheith an-suntasach. Moladh inti freisin go ndéanfaí sainchúram an Choimisiúin Imscrúdúcháin a leathnú leis na scoileanna uile lae agus cónaithe a chur san áireamh. Léirigh sé seo mianta na marthanóirí a ghlac páirt san Fhiosrúchán Scóipe.
Mar thoradh air sin, tá sainchúram an Choimisiúin i bhfad níos leithne ná ceann an Fhiosrúcháin Scóipe, a dhírigh ar scoileanna amháin arna reáchtáil ag oird rialta. Scrúdóidh an Coimisiún an chaoi ar láimhseáladh líomhaintí agus ábhair imní faoi dhrochúsáid ghnéasach leanaí i ngach scoil in Éirinn idir 1927 agus 2013, ina roghnófar cásanna samplacha le tuilleadh imsrúdúcháin dhlíthiúla a dhéanamh orthu.